Divisional Secretariat - Kattankudy

காத்தான்குடி பிரதேச செயலக உத்தியோகத்தர்களின் உளநல மேம்பாட்டை நோக்கமாகக் கொண்டு, உளநல மேம்பாடு தொடர்பான செயலமர்வு 13.10.2026 அன்று பிற்பகல் நடைபெற்றது.

பிரதேச செயலாளரின் ஏற்பாட்டில் நடைபெற்ற இச்செயலமர்வில் வளவாளராகக் கலந்து கொண்ட திரு. மனூஸ் அபூபக்கர் அவர்கள், உளநல ஆரோக்கியத்தின் முக்கியத்துவம், மன அழுத்தத்தைக் கையாளும் முறைகள் மற்றும் பணியிடத்தில் நேர்மறையான மனநிலையைப் பேணுதல் தொடர்பான விடயங்களை விளக்கினார்.

இச்செயலமர்வு உத்தியோகத்தர்களின் உளநல ஆரோக்கியத்தை மேம்படுத்துவதுடன், பணியிடச் சவால்களைச் சிறப்பாகக் கையாளும் திறனை வளர்த்து, வினைத்திறனான அலுவலகச் செயற்பாடுகளுக்கும் பொதுமக்களுக்கான சேவை வழங்கலுக்கும் பங்களிக்கும் நோக்கில் ஏற்பாடு செய்யப்பட்டது.

இந்நிகழ்வில் பிரதேச செயலக உத்தியோகத்தர்கள் அனைவரும் கலந்துகொண்டனர்.

co1 co2 co3 co4 co5

பிரதேச அனர்த்த முகாமைத்துவ ஒருங்கிணைப்புக் குழுக் கூட்டமானது, பிரதேச செயலாளர் அவர்களின் தலைமையில் பிரதேச செயலக மாநாட்டு மண்டபத்தில் 14.10.2026 புதன்கிழமை நடைபெற்றது. இக்கூட்டத்தில் மாவட்டச் செயலகத்தின் அனர்த்த முகாமைத்துவப் பிரதிப் பணிப்பாளர், பிரதேச செயலக நிர்வாக உத்தியோகத்தர், கிராம நிர்வாக உத்தியோகத்தர், கிராம உத்தியோகத்தர்கள், பிரதேச செயலக உத்தியோகத்தர்கள், அழைப்பு விடுக்கப்பட்ட ஏனைய அரச நிறுவனங்களின் பிரதிநிதிகள், சமூக அமைப்புக்களின் பிரதிநிதிகள் மற்றும் முப்படைகளின் பிரதிநிதிகள் உள்ளிட்ட பலர் கலந்துகொண்டனர்.

வடகிழக்குப் பருவமழைக் காலத்தில் ஏற்படக்கூடிய அனர்த்தங்களை எதிர்கொள்வதற்கான முன்னாயத்தங்களை வலுப்படுத்துதல், தொடர்புடைய நிறுவனங்களுக்கிடையிலான ஒருங்கிணைப்பை மேம்படுத்துதல் மற்றும் பொதுமக்களுக்கு உரிய விழிப்புணர்வை ஏற்படுத்துதல் ஆகியவற்றை நோக்கமாகக் கொண்டு இக்கூட்டம் முன்னெடுக்கப்பட்டது.

di1 di3 di4 di5 di6 di7 di8 di9 di10 di11 di12

aq1 aq2 aq3 aq4 aq5

மட்டக்களப்பு பாராளுமன்ற உறுப்பினரும் சிறிலங்கா முஸ்லிம் காங்கிரஸின் தவிசாளருமான எம்.எல்.ஏ.எம்.ஹிஸ்புல்லாஹ்வின் பன்முகப்படுத்தப்பட்ட வரவு செலவுத் திட்டம் – 2026 நிதி ஒதுக்கீட்டின் கீழ், காத்தான்குடியில் உள்ள பாடசாலைகள் மற்றும் சமூக நிறுவனங்களின் அடிப்படை வசதிகளை மேம்படுத்தும் நோக்கில் ரூபா பத்து லட்சம் பெறுமதியான பல்வேறு பொருட்கள் மற்றும் உபகரணங்கள் வழங்கி வைக்கப்பட்டன.

குறித்த பொருட்கள் மற்றும் வசதிகள் கையளிக்கும் நிகழ்வு இன்று புதன்கிழமை (30) பிரதேச செயலகத்தில், பிரதேச செயலாளர் திருமதி நிஹாரா மௌஜூத் தலைமையில் நடைபெற்றது.

இந்நிகழ்வில் பாராளுமன்ற உறுப்பினர் எம்.எல்.ஏ.எம்.ஹிஸ்புல்லாஹ், நகர முதல்வர் எஸ்.எச்.எம்.அஸ்பர் ,பிரத்தியேக செயலாளர் சட்டமாணி ஈ எம்.றுஸ்வின் (நகரசபை உறுப்பினர்), உதவிப் பிரதேச செயலாளர் திருமதி எஸ்.எம்.சில்மியா, திட்டமிடல் பிரதிப் பணிப்பாளர் ஹன்சுல் சிஹானா, நகர சபை உறுப்பினர்களான சல்மா அமீர் ஹம்ஸா, ரிஜாஸ் முகமட் உள்ளிட்ட பலர் கலந்து கொண்டனர்.

மெத்தைப் பள்ளி வித்தியாலயம், கரீப் நவாஸ் பவுன்டேஷன், பாத்திமா பாலிகா வித்தியாலயம், அன்வர் வித்தியாலயம், தாருஸ்ஸலாம் வித்தியாலயம் ஆகியவற்றின் அத்தியாவசிய தேவைகளை நிவர்த்தி செய்வதற்காக குறித்த நிதி ஒதுக்கீடுகள் பயன்படுத்தப்பட்டுள்ளன.

இவ்வாறு வழங்கப்பட்ட வசதிகள் மூலம் மாணவர்களின் கல்வி மற்றும் இணைப்பாடவிதான செயற்பாடுகளை மேலும் மேம்படுத்துவதற்கான வாய்ப்புகள் ஏற்படுத்தப்பட்டுள்ளன.

பன்முகப்படுத்தப்பட்ட வரவு செலவுத் திட்டத்தின் ஊடாக கல்வித்துறைக்கு முன்னுரிமை வழங்கி, பிரதேசத்தின் பாடசாலைகள் மற்றும் கல்வி நிறுவனங்களின் தேவைகளை இனங்கண்டு அவற்றை நிறைவேற்றும் நடவடிக்கைகள் பாராளுமன்ற உறுப்பினரால் முன்னெடுக்கப்பட்டு வருகின்றமை குறிப்பிடத்தக்கது.

gd2 gd3 gd4 gd5 gd1

தெங்கு அபிவிருத்தி அதிகார சபையினால் நாடளாவிய ரீதியில் அரச அதிகாரிகளுக்காக முன்னெடுக்கப்படும் “ஆரோக்கியமான உயர்தர தேங்காய் எண்ணெய் நுகர்வு, தேங்காய் வீணாவதைக் குறைத்தல் மற்றும் தெங்கு அபிவிருத்தி அதிகார சபையின் சேவைகள்” தொடர்பான விழிப்புணர்வுக் கருத்தரங்கு இன்று (23.09.2026) காத்தான்குடி பிரதேச செயலக மாநாட்டு மண்டபத்தில் நடைபெற்றது.

காத்தான்குடி பிரதேச செயலாளர் திருமதி. நிஹாரா மௌஜூத் அவர்களின் வழிகாட்டலின் கீழ் நடைபெற்ற இந்நிகழ்வில், தேங்காய் மற்றும் தேங்காய் சார்ந்த உற்பத்திப் பொருட்களை ஆரோக்கியமான முறையில் பயன்படுத்துதல், உயர்தர தேங்காய் எண்ணெயின் நுகர்வு, தேங்காய் வீணாவதைக் குறைத்தல் மற்றும் தெங்கு அபிவிருத்தி அதிகார சபையினால் வழங்கப்படும் சேவைகள் தொடர்பில் அரச உத்தியோகத்தர்களுக்கு விழிப்புணர்வு வழங்கப்பட்டது.

தேங்காய் எண்ணெயின் தரம் மற்றும் ஆரோக்கியமான நுகர்வு தொடர்பான விடயங்கள், தேங்காய் வீணாவதைத் தவிர்ப்பதற்கான நடைமுறைகள், தேங்காய் வளத்தை வினைத்திறனுடன் பயன்படுத்துதல் உள்ளிட்ட விடயங்கள் தொடர்பில் வளவாளர்களால் விளக்கமளிக்கப்பட்டன.

இந்நிகழ்வில் தென்னை அபிவிருத்தி அதிகார சபையின் சிரேஷ்ட பரிசோதகர் H. R. A. Chandana, தென்னை அபிவிருத்தி அதிகார சபையின் கிழக்கு மாகாண பரிசோதகர் A. A. Azeer Ahamed மற்றும் மட்டக்களப்பு மாவட்ட நிகழ்ச்சித் திட்ட உதவியாளர் P. Vithurshan மற்றும் பொது சுகாதாரப் பரிசோதகர்(PHI) M. ரஹ்மதுல்லாஹ் ஆகியோர் வளவாளர்களாகக் கலந்துகொண்டு, துறைசார் தகவல்களை வழங்கினர்.

மேலும், தெங்கு அபிவிருத்தி அதிகார சபையினால் பொதுமக்கள் மற்றும் அரச நிறுவனங்களுக்கு வழங்கப்படும் சேவைகள் தொடர்பிலும் உத்தியோகத்தர்களுக்கு தெளிவுபடுத்தப்பட்டது.
இவ்விழிப்புணர்வுக் கருத்தரங்கு, ஆரோக்கியமான உணவுப் பயன்பாடு, தென்னை வளத்தைப் பாதுகாத்தல் மற்றும் வீண்விரயத்தைக் குறைத்தல் தொடர்பான அறிவை அரச உத்தியோகத்தர்களிடையே மேலும் மேம்படுத்தும் வகையில் அமைந்திருந்தது.
அத்துடன் காத்தான்குடி பிரதேச செயலக உத்தியோகத்தர்கள் உள்ளிட்டோர் இந்நிகழ்வில் கலந்துகொண்டமை குறிப்பிடத்தக்கது.
 